Бишкектиктер үчүн жакшы жаңылык. Автобустар кондиционер менен жабдылат

Бишкек шаарында коомдук транспорттун ыңгайлуулугун жогорулатуу максатында шаардык автобустарды кондиционер системалары менен жабдуу пландалууда. Бул тууралуу «Бишкек шаардык транспорт» муниципалдык ишканасы билдирди.

Маалыматка ылайык, долбоорду ишке ашыруу үчүн мамлекеттик сатып алуулар порталында тендер жарыяланган. Кондиционерлерди сатып алууга жана орнотууга жалпысынан 144,27 миллион сом каралган. Каражат шаардык бюджеттен бөлүнүп, транспорттук инфраструктураны жаңылоо программасынын алкагында жумшалат.

Мындай чечим жүргүнчүлөрдөн түшкөн көптөгөн кайрылуулардын негизинде кабыл алынган. Шаар тургундары жай мезгилинде автобустардын ичиндеги абанын өтө ысып кетишине байланыштуу нааразычылыктарын билдирип келишкен.

Техникалык талаптарга ылайык, жеңүүчү компания климаттык жабдууларды жеткирип жана орнотуп гана тим болбостон, аларды кепилдик тейлөө менен да камсыздоого тийиш. Ошондой эле кондиционерлер муниципалдык автопарктын негизги бөлүгүн түзгөн Yutong жана Ankai үлгүсүндөгү автобустардын электр системаларына шайкеш болушу зарыл.

Бишкек мэриясы коомдук транспорттун сапатын жана жүргүнчүлөр үчүн ыңгайлуулукту жогорулатуу шаардык транспорт системасын өнүктүрүүдөгү артыкчылыктуу багыттардын бири экенин белгиледи.

Долбоор ишке ашкандан кийин борбор калаанын тургундары жана коноктору жайкы аптапта коомдук транспортту кыйла ыңгайлуу пайдалана алышат.