Башкы прокуратура менен бизнес өкүлдөрү достук футбол турнирин өткөрдү
Кыргыз Республикасынын Башкы прокуратурасы бизнес-ассоциациялар жана ЕККУнун Бишкектеги Программалык кеңсеси менен биргеликте ишкерлердин жана инвесторлордун укуктарын коргоо боюнча Консультативдик кеңештин алкагында достук футбол турнирин өткөрдү.
Спорттук иш-чара мамлекеттик органдар менен бизнес өкүлдөрүнүн ортосундагы ачык диалогду, өз ара ишенимди жана өнөктөштүк мамилелерди бекемдөөгө багытталды. Ошондой эле сергек жашоо образын жайылтуу жана кесиптештер ортосундагы ынтымакты чыңдоо максатын көздөдү.
Турнирге Башкы прокуратуранын, бизнес-ассоциациялардын жана ЕККУнун Бишкектеги Программалык кеңсесинин командалары катышып, оюндар жогорку маанайда жана достук шартта өттү. Катышуучулар мындай форматтагы иш-чаралар мамлекеттик органдар менен жеке сектордун өкүлдөрүнүн ортосундагы кызматташууну бекемдеп, ишенимдүү өнөктөштүктү өнүктүрүүгө өбөлгө түзөрүн белгилешти.
Мелдештин жыйынтыгында бардык командаларга эстелик белектер тапшырылып, тараптар мындан ары да биргелешкен демилгелерди ишке ашырууга жана өз ара пайдалуу кызматташууну улантууга даяр экендиктерин билдиришти.
