Президенттик шайлоону дайындоо боюнча токтом комитетте жактырылды

Бүгүн, 22-сентябрда Жогорку Кеңештин тармактык комитети Кыргыз Республикасынын Президентин шайлоону дайындоо жөнүндө токтом долбоорун жактырды.

Токтом долбоору Конституциялык мыйзамдар, мамлекеттик түзүлүш, жергиликтүү өз алдынча башкаруу жана Жогорку Кеңештин Регламенти боюнча комитеттин жыйынында каралды.

Жыйында комитеттин төрайымы Гульнара Акимбаева баяндама жасап, Президенттик шайлоо Жогорку Кеңештин токтому менен дайындаларын белгиледи.

Анын айтымында, Конституцияга ылайык, кезектеги президенттик шайлоо иштеп жаткан мамлекет башчысынын ыйгарым укуктарынын мөөнөтү аяктаган жылдын январь айынын төртүнчү шаршембисинде өткөрүлөт.

Талкуунун жыйынтыгында комитет токтом долбоорун жактырып, аны Жогорку Кеңештин кароосуна жөнөттү.