Камсыздандыруу төлөмдөрү 500 млн сомго жетти

Мамлекеттик камсыздандыруу уюму 2026-жылдын тогуз айында 500 млн сом камсыздандыруу төлөмдөрүн жүргүздү. Бул тууралуу «Кабар» агенттигиндеги маалымат жыйында «Мамлекеттик камсыздандыруу уюму» ААК башкармалыгынын төрагасынын орун басары Закир Айдралиев билдирди.

Анын айтымында, камсыздандыруу төлөмдөрүнүн көлөмү акыркы жылдары кыйла өскөн. Тактап айтканда, 2023-жылы 27 млн сом, 2024-жылы 69 млн сом, 2025-жылы 127 млн сом төлөнгөн. Ал эми быйыл жыл аяктай электигине карабастан, тогуз айдын жыйынтыгында төлөмдөрдүн көлөмү 500 млн сомго жетти.

Айдралиевдин маалыматына караганда, турак жайды камсыздандыруу менен камтуу да өсүүдө. 2023-жылы бул көрсөткүч 8%, 2024-жылы 11%, 2025-жылы 24% түзгөн. Учурда турак жайлардын 33%ы камсыздандырылган. Жыл соңуна чейин бул көрсөткүчтү 40%га жеткирүү пландалууда.

Ошондой эле 2024-жылы Кыргызстанда автотранспорт каражаттарынын ээлеринин жарандык-укуктук жоопкерчилигин милдеттүү камсыздандыруу — ОСАГО киргизилген. Анын алкагында жол кырсыгынан жабыркаган адамдардын мүлкүнө, өмүрүнө жана ден соолугуна келтирилген зыяндын орду толтурулат.

Учурда ОСАГО боюнча 146 млн сом, ал эми турак жайды камсыздандыруу боюнча 57 млн сом төлөнгөн. Калган сумма камсыздандыруунун башка түрлөрүнө туура келет.

Жыйынтыгында, 2026-жылдын тогуз айында камсыздандыруунун бардык түрлөрү боюнча төлөмдөрдүн жалпы көлөмү 500 млн сомду түздү.