Коррупция тууралуу кабарлаган жарандар мамлекеттик коргоого алынат

Ички иштер министрлиги коррупция тууралуу кабарлаган жарандарды коргоону күчөтүүчү мыйзам долбоорун коомдук талкууга чыгарды.

ИИМдин маалыматына ылайык, учурдагы мыйзамда коргоо чаралары көбүнчө кылмыш иши козголгондон кийин гана колдонулат. Ал эми жарандар көп учурда мыйзам бузуу тууралуу иш баштала электе билдиришет.

Жаңы долбоорго ылайык, коррупция тууралуу ишенимдүү маалыматты атайын корголгон каналдар аркылуу берген адамдар мамлекеттик коргоого алынат.

Министрлик бул өзгөртүү маалымат берген жарандардын коопсуздугун камсыз кылууга багытталганын белгиледи.