Кош бойлуу аялды алып бараткан тез жардам кырсыктады

Бишкекте жол кырсыгына кабылган тез жардам унаасы кош бойлуу аялды шашылыш ооруканага жеткирип бара жаткан. Бактыга жараша, бейтап жабыркаган эмес.

Бул тууралуу Бишкек шаардык Тез жардам борборунун директору Егор Борисов билдирди. Анын айтымында, тез жардам унаасы сиренасын жана жаркылдаган маяктарын күйгүзүп бара жаткан.

Кырсык Анкара жана Жукеев-Пудовкин көчөлөрүнүн кесилишинде болгон. Тез жардам унаасы Жукеев-Пудовкин көчөсү менен түндүктү көздөй бара жатканда Toyota Camry үлгүсүндөгү унаа менен кагышкан.

Соккудан кийин эки унаа инерция менен Honda Inspire жана Volkswagen унааларын сүзгөн.

Кырсыктын кесепетинен тез жардам кызматкери моюн омурткасынын байламталары чоюлуп жаракат алган. Ал эми кош бойлуу аял аман-эсен, абалы жакшы.

Бардык төрт унаа айып короого киргизилди. Учурда соттук экспертизалар дайындалып, милиция кырсыктын жагдайларын тактап жатат.