Көздүн көрүүсүн кантип сактайбыз? Адистер сунуштаган пайдалуу кеңештер

Көз – адамдын эң баалуу сезүү органдарынын бири. Бирок акыркы жылдары компьютер, смартфон жана башка санариптик түзмөктөрдү көп колдонуу көздүн саламаттыгына терс таасирин тийгизип, көрүүнүн начарлашына алып келген учурлар көбөйүүдө. Адистер күнүмдүк жөнөкөй эрежелерди сактоо менен көздүн көрүүсүн узак убакытка чейин жакшы абалда кармоого болорун белгилешет.

Экран алдында иштегенде тыныгуу жасаңыз

Компьютерде же телефондо бир нече саат бою үзгүлтүксүз иштөө көздүн булчуңдарын чарчатып, кургактыкты жана ыңгайсыздыкты жаратат. Мындай учурда дүйнө жүзүндө сунушталган 20-20-20 эрежеси жардам берет. Ага ылайык, ар 20 мүнөт сайын 20 секунд бою болжол менен 6 метр алыстыктагы нерсени карап туруу көздүн чыңалуусун азайтат.

Ошондой эле монитор көздөн 50–70 сантиметр аралыкта жайгашып, анын жогорку бөлүгү көздүн деңгээлинен бир аз төмөн болгону туура.

Көз үчүн пайдалуу азыктарды көбүрөөк колдонуңуз

Көрүүнүн жакшы болушу туура тамактанууга да байланыштуу. А витамини, С жана Е витаминдери, лютеин, цинк жана омега-3 май кислоталары көздүн тор кабыгын коргоого жардам берет. Адистер күнүмдүк рационго төмөнкү азыктарды кошууну сунушташат. Сабиз, ашкабак, шпинат, брокколи, балык, жумуртка, жаңгак, көк мөмөлөр. Бул азыктардын көз үчүн пайдасы зор.

Көздүн кургап кетишине жол бербеңиз

Экранды узак караганда адам кадимкиге караганда аз ирмелет. Натыйжада көздүн үстү кургап, кызарып же ачышып кетиши мүмкүн. Ошондуктан бат-баттан ирмелип туруу, бөлмөдөгү абанын нымдуулугун көзөмөлдөө жана зарыл учурда офтальмолог сунуштаган нымдоочу көз тамчыларын колдонуу пайдалуу. Ошондой эле көздү күндүн зыяндуу нурларынан сактаңыз. Ультрафиолет нурлары көздүн чел кабыгына жана тор кабыгына зыян келтириши мүмкүн. Ошондуктан күн ачык учурда UV коргоосу бар сапаттуу күндөн коргоочу көз айнек тагынуу сунушталат.

Баса, уйку жана эс алуу да  көз үчүн маанилүү.  Толук кандуу уйку көздүн чарчоосун басаңдатып, анын калыбына келишине жардам берет. Адистер чоң кишилерге күнүнө 7–9 саат уктоону сунушташат. Ошондой эле китеп окууда же майда жумуштарды аткарууда бөлмөнүн жарыгы жетиштүү болушу керек.

Сергек жашоо образы көрүүнү да коргойт

Тамеки чегүү жана алкоголдук ичимдиктерди ашыкча колдонуу көздүн кан тамырларына терс таасир тийгизип, айрым оорулардын пайда болуу коркунучун жогорулатат. Ал эми үзгүлтүксүз кыймыл-аракет, таза абада сейилдөө жана жетиштүү көлөмдө суу ичүү жалпы организм менен катар көздүн саламаттыгына да оң таасирин берет. Ошондуктан көздү үзгүлтүксүз текшертип туруңуз. Көрүүдө эч кандай көйгөй байкалбаса да, жылына жок дегенде бир жолу офтальмологго көрүнүү сунушталат. Бул көптөгөн көз ооруларын алгачкы стадиясында аныктап, өз убагында дарылоого мүмкүнчүлүк түзөт. Маселен, төмөнкү белгилердин бири байкалса, өз алдынча дарыланбай, мүмкүн болушунча тез арада дарыгерге кайрылуу зарыл.  Эгер сизде көрүүнүн күтүүсүз начарлашы, көздүн катуу оорушу, көздүн кызарып же шишип кетиши, көз алдында кара тактардын көбөйүшү, көздөн көп жаш агышы же ириң бөлүнүшү сыяктуу жагдайлар бар болсо, кайдыгер карабай дарыгерге кайрылыңыз.

Көздүн саламаттыгы – жашоо сапатынын маанилүү бөлүгү. Күн сайын жөнөкөй эрежелерди сактоо, туура тамактануу жана көзгө өз убагында кам көрүү көрүүнү көп жылдар бою жакшы деңгээлде сактоого жардам берерин эстен чыгарбаңыз.