Кулубаев Индонезия ТИМ башчысынын орун басары менен эки тараптуу кызматташууну талкуулады
2026-жылдын 2-июлунда Кыргыз Республикасынын тышкы иштер министри Жээнбек Кулубаев Индонезия Республикасынын тышкы иштер министринин орун басары Анис Маттаны кабыл алды.
Жолугушууда кыргыз-индонезиялык кызматташтыктын актуалдуу багыттары талкууланып, саясий диалогду чыңдоо, жогорку деңгээлдеги өз ара сапарларды уюштуруу, келишимдик-укуктук базаны кеңейтүү жана эл аралык уюмдардын алкагындагы кызматташтык маселелери каралды.
Министр Жээнбек Кулубаев Кыргызстан Индонезияны Азия-Тынч океан аймагындагы маанилүү өнөктөш катары бааларын белгилеп, соода-экономикалык, инвестициялык, туристтик, маданий-гуманитардык кызматташтыкты, ошондой эле халал-индустриясы жаатындагы долбоорлорду өнүктүрүүнүн маанилүүлүгүнө токтолду.
Өз кезегинде Анис Матта Индонезия Кыргызстан менен мазмундуу диалогду улантууга, экономикалык байланыштарды кеңейтүүгө, ишкер чөйрөлөрдүн кызматташтыгын жана маданий-гуманитардык өз ара аракеттенүүнү бекемдөөгө даяр экенин билдирди.
Жолугушуунун соңунда тараптар эки өлкөнүн достук мамилелерин мындан ары чыңдоого жана эки тараптуу кызматташтыкты жаңы деңгээлге чыгарууга кызыкдар экенин ырасташты.
