Кыргызстан менен Корея илим билим жана кадр даярдоо жаатындагы байланышты өнүктүрөт

Кыргыз Республикасынын экономика жана коммерция министри Бакыт Сыдыков жетектеген делегация Корея Республикасына болгон иш сапарынын алкагында Ыйджонбу шаарындагы Шинхан университетине барды.

Ошондой эле Кыргыз Республикасынын Экономика жана коммерция министрлиги менен Шинхан университетинин ортосунда өз ара түшүнүшүү жөнүндө меморандумга кол коюлду. Макулдашуу кадрларды даярдоо, квалификацияны жогорулатуу, стажировкаларды уюштуруу жана илимий-изилдөө иштерин өнүктүрүү багытындагы кызматташууну камтыйт.

Иш-чаранын алкагында министр Бакыт Сыдыковго саясий илимдер боюнча ардактуу доктор даражасы (Ph.D. in Political Science) ыйгарылып, университеттин ардак грамотасы тапшырылды.

Расмий бөлүктөн кийин министр «Экономикалык прогноздоого киришүү: инструменттер, колдонуу ыкмалары жана чектөөлөр» аттуу лекция окуп, экономикалык божомолдоонун заманбап ыкмалары, мүмкүнчүлүктөрү жана чектөөлөрү тууралуу кеңири маалымат берди.

Лекцияга 500дөн ашуун студент жана чет өлкөлүк угуучулар катышып, талкуу суроо-жооп форматында уланды.