Кыргыз Республикасынын Президентине караштуу Инвестициялар боюнча улуттук агенттиктин башчысы Равшанбек Сабиров Пакистан Ислам Республикасынын Лахор шаарындагы Кыргыз Республикасынын Ардактуу консулу менен жолугушту.
Жолугушуунун жүрүшүндө Кыргызстан менен Пакистандын ортосундагы инвестициялык жана соода-экономикалык кызматташууну өнүктүрүүнүн актуалдуу маселелери, ошондой эле келечектүү багыттар талкууланды.
Пакистан тарап Кыргызстандын инвестициялык мүмкүнчүлүктөрү, артыкчылыктуу тармактары жана өлкөдө инвесторлор үчүн түзүлгөн мамлекеттик колдоо механизмдери тууралуу маалымат алды.
Равшанбек Сабиров эки өлкөнүн ортосундагы кызматташтыкты кеңейтүүнүн, жаңы инвестициялык өнөктөштөрдү тартуунун жана биргелешкен долбоорлорду ишке ашыруунун маанилүүлүгүн белгиледи.
«Кыргыз Республикасы чет өлкөлүк өнөктөштөр менен өз ара пайдалуу кызматташууну өнүктүрүүгө жана биргелешкен долбоорлорду ишке ашыруу үчүн жагымдуу шарттарды түзүүгө кызыкдар. Биз инвесторлорго келечектүү багыттарды сунуштоого, тиешелүү колдоо көрсөтүүгө жана эки өлкөнүн бизнес коомчулуктарынын ортосунда түз диалогду өнүктүрүүгө даярбыз», — деди Равшанбек Сабиров.
Жолугушууда туризм, халал индустриясы, эт өндүрүү жана кайра иштетүү, санариптик банктык кызматтар, ошондой эле башка келечектүү тармактардагы биргелешкен долбоорлорду ишке ашыруу мүмкүнчүлүктөрү каралды.
Тараптар ишкердик байланыштарды чыңдоонун, тажрыйба жана маалымат алмашууну кеңейтүүнүн, ошондой эле өз ара пайдалуу демилгелерди ишке ашыруу үчүн кызматташууну улантуунун маанилүүлүгүн белгилешти.
Жолугушуунун жыйынтыгында Кыргызстан менен Пакистан инвестициялык өнөктөштүктү мындан ары өнүктүрүүгө жана жаңы долбоорлорду ишке ашырууга кызыкдар экенин билдиришти.
