Кыргызстандагы ар бир бакка санариптик паспорт берилет

Кыргызстанда шаарлардын жана айылдардын жашыл аймактарын коргоону күчөтүү боюнча мыйзам долбоору сунушталды.

Документке ылайык, парктар менен скверлердин аянтын кыскартууга тыюу салынат. Кыйылган ар бир бактын ордуна куруучу кеминде 5 ири көчөт отургузуп, аларды 3 жыл багууга милдеттүү болот.

Ошондой эле 10дон ашык бак-дарактарды кыюуну караган долбоорлор экологиялык экспертизадан өтөт.

Мындан тышкары, ар бир бакка санариптик паспорт берилип, электрондук реестр түзүлөт.

Курулуш учурунда бактарга зыян келтиргендерге айып пул салуу сунушталууда: жарандарга — 7 миң сом, юридикалык жактарга — 13 миң сом.