Майыптыгы бар балдардын ассистенттери коомдук транспортто акысыз жүрөт
Демилге майыптыгы бар балдарды тарбиялап жаткан үй-бүлөлөрдү колдоого жана алардын шаар ичинде эркин жүрүүсүнө ыңгайлуу шарттарды түзүүгө багытталган.
Чечимге ылайык, Бишкек шаарында туруктуу каттоосу бар 18 жашка чейинки майыптыгы бар балдардын жеке ассистенттери автобустарда жана башка муниципалдык коомдук транспорттордо акысыз жүрө алышат.
Жеңилдетилген транспорттук картаны алуу үчүн төмөнкү даректерге кайрылуу керек:
- Ленин жана Биринчи Май райондору үчүн — Токтогул көчөсү, 245;
- Свердлов району үчүн — Чүй проспектиси, 28;
- Октябрь району үчүн — Байтик Баатыр көчөсү, 17.
Белгилей кетсек, жеке ассистенттер күн сайын майыптыгы бар балдарды билим берүү, медициналык, спорттук жана чыгармачылык мекемелерге коштоп барышат. Акысыз жол жүрүү мүмкүнчүлүгү үй-бүлөлөрдүн каржылык чыгымдарын азайтып, шаар ичинде жүрүүнү жеңилдетет.
Адистердин айтымында, бул чечим майыптыгы бар балдардын социалдык кызматтарга, билим берүү жана медициналык мекемелерге жеткиликтүүлүгүн кеңейтүүгө, ошондой эле алардын үй-бүлөлөрүнө колдоо көрсөтүүгө өбөлгө түзөт.
