Марлен Маматалиев Катардын элчиси менен парламенттер аралык кызматташтыкты талкуулады
Жогорку Кеңештин Төрагасы Марлен Маматалиев бүгүн, 24-сентябрда, Катардын Кыргызстандагы элчиси Али Жабер Аль-Гуфран Аль-Марри менен жолугушту.
Жолугушууда Кыргызстан менен Катардын саясий-экономикалык, маданий-гуманитардык байланыштарын кеңейтүү жана парламенттер аралык кызматташтыкты күчөтүү маселелери талкууланды.
Марлен Маматалиев 1998-жылы дипломатиялык мамилелер түзүлгөндөн бери эки өлкөнүн өнөктөштүгү жигердүү өнүгүп келе жатканын белгилеп, бул байланыштарды парламенттик деңгээлде да кеңейтүүгө кызыкдар экенин айтты.
Ал депутаттардын достук топторунун ишин активдештирүүнү жана эки тараптуу иш сапарларды уюштурууну сунуштады. Ошондой эле Катар парламентинин төрагасы Хасан бин Абдулла Аль-Ганимди Кыргызстанга расмий сапар менен келип кетүүгө чакырды.
Өз кезегинде элчи Али Жабер Аль-Гуфран Аль-Марри Кыргызстан Катар үчүн чөлкөмдөгү маанилүү өнөктөштөрдүн бири экенин белгилеп, парламенттер аралык байланыштарды өнүктүрүү боюнча сунуштарды колдоду.
Тараптар мындан тышкары соода-экономикалык байланыштарды кеңейтүү жана гуманитардык долбоорлорду улантуу боюнча пикир алышты.
