Марлен Маматалиев Мажарстандын элчисин кабыл алды

Жолугушуунун жүрүшүндө Кыргызстан менен Мажарстандын ортосундагы саясий, экономикалык жана маданий-гуманитардык кызматташтыктын учурдагы абалы жана келечеги талкууланды. Ошондой эле эки өлкө ортосундагы байланыштарды чыңдоодо элчиликтин салымы белгиленди.

Төрага Марлен Маматалиев элчинин ишмердүүлүгүнө жогору баа берип, анын аракеттеринин натыйжасында кыргыз-мажар кызматташтыгы стратегиялык деңгээлге көтөрүлүп, бардык багыттар боюнча өнүгүүгө жетишкенин белгиледи.

Мындан тышкары, Жогорку Кеңеш менен Мажарстандын Мамлекеттик жыйыны ортосунда туруктуу парламенттер аралык диалог калыптанганы айтылып, бул байланыштар эки өлкөнүн мамилелерин бекемдөөгө олуттуу түрткү берип жатканы баса белгиленди. Тараптар депутаттык достук топторунун жана тармактык комитеттердин алкагында мыйзам чыгаруу жана санариптештирүү багытында тажрыйба алмашууну улантуунун маанилүүлүгүн белгилешти.

Жолугушууда маданий-гуманитардык кызматташтыкты кеңейтүү маселеси да көтөрүлүп, Төрага быйыл Кыргызстанда өтө турган VI Дүйнөлүк көчмөндөр оюндарына мажар спортчуларын жана өкүлдөрүн чакырды.

Өз кезегинде элчи Шандор Дороги кызматташтыкты өнүктүрүүгө колдоо көрсөткөнү үчүн ыраазычылык билдирип, дипломатиялык ишмердүүлүгүнүн жыйынтыктары тууралуу маалымат берди. Ал ошондой эле Мажарстандын Мамлекеттик жыйынынын Төрайымы Агнеш Форстхоффердин саламын жеткирди.

Тараптар ТүркПА өңдүү эл аралык парламенттик аянтчаларда кызматташууну активдештирүү зарылдыгын да белгилешти.