Медербек Сатыев: Так маалымат — коомдун ишениминин негизи

Сиздерди 7-ноябрь — Кыргыз Республикасынын Басма сөз жана маалымат күнү менен чын жүрөктөн куттуктайм!

Бул күн — коомго акыйкат маалымат жеткирүүнү кесиптик милдети жана жарандык жоопкерчилиги катары аркалап келген журналисттердин, редакторлордун, кабарчылардын, басма сөз кызматкерлеринин жана жалпыга маалымдоо каражаттарынын бардык өкүлдөрүнүн эмгегине урмат көрсөтүүнүн өзгөчө күнү.

Маалымат — коомдун өнүгүүсүнө багыт берген, адамдардын дүйнө таанымын калыптандырган жана мамлекет менен жарандардын ортосундагы ишенимди бекемдеген маанилүү күч. Ал эми ошол маалыматты так, ишенимдүү жана өз убагында коомчулукка жеткирүү — чоң жоопкерчиликти, терең билимди, кесипкөйлүктү жана жарандык позицияны талап кылган татаал иш.

Журналистика — жөн гана маалымат таратуу эмес. Бул — коомдун үнүн угузуу, маанилүү маселелерди көтөрүү, коомдук пикирдин калыптанышына өбөлгө түзүү жана мамлекеттин өнүгүүсүндөгү орчундуу процесстерди чагылдыруу миссиясы. Сөз эркиндигин, маалыматтын ачыктыгын жана ар түрдүү пикирлердин болушун камсыз кылуу демократиялык коомдун маанилүү шарттарынын бири болуп саналат. Мындай шартта журналисттин ар бир сөзү, ар бир материалы жана ар бир маалыматы коом алдындагы жоопкерчилик менен коштолууга тийиш.

Өзгөчө белгилей кетүүчү жагдай — мыйзамдуулукту жана адилеттүүлүктү бекемдөөдө, жарандардын укуктук маданиятын жогорулатууда жалпыга маалымдоо каражаттарынын орду чоң. Коомчулуктун мыйзамдар, сот адилеттиги жана сот тутумунун ишмердүүлүгү тууралуу туура жана толук маалыматка ээ болушу укуктук мамлекетти өнүктүрүүнүн маанилүү шарттарынын бири.

Сот бийлиги үчүн ачыктык, айкындуулук жана коом менен натыйжалуу байланыш түзүү — ишенимди бекемдөөнүн негизги багыттары. Бул жаатта жалпыга маалымдоо каражаттары маанилүү өнөктөш болуп саналат. Соттордун ишмердүүлүгүн мыйзам чегинде, объективдүү жана ар тараптуу чагылдыруу коомчулуктун сот адилеттиги тууралуу түшүнүгүн кеңейтип, жарандардын укукка болгон урмат-сыйын арттырууга көмөктөшөт.

Ошол эле учурда сот тутумуна тиешелүү болгон маалыматтарды чагылдырууда тактыкты, бейтараптуулукту, кесиптик этиканы жана адамдын укуктары менен мыйзамдуу кызыкчылыктарын урматтоо принциптерин сактоо өзгөчө мааниге ээ. Анткени маалыматка болгон ишеним — коомдук ишенимдин ажырагыс бөлүгү.

Бүгүнкү санариптик доордо маалымат агымы болуп көрбөгөндөй тездеп, аны таратуунун мүмкүнчүлүктөрү кеңейди. Муну менен катар такталбаган маалыматтарга, бир жактуу пикирлерге жана текшерилбеген кабарларга каршы туруу маселеси да курчуду. Мындай шартта кесипкөй журналистиканын баалуулугу дагы да жогорулап, коом үчүн чындыкты тактоо, фактыларга таянуу жана жоопкерчиликтүү маалымат таратуу өзгөчө зарыл болуп калды.

Мен журналисттердин күн сайын аткарып жаткан эмгегин жогору баалайм. Коомдун кызыкчылыгы үчүн тынымсыз изденип, маанилүү окуялардын чордонунда жүрүп, кээде татаал шарттарда да өз кесибине берилгендик менен кызмат кылып келе жаткан ар бириңиздердин эмгегиңиздер терең урмат-сыйга татыктуу.

Ушул мүмкүнчүлүктөн пайдаланып, улуттук журналистиканын өнүгүшүнө, маалымат мейкиндигинин калыптанышына жана коомдун маалыматтуулугун жогорулатууга салым кошуп келген ардагер журналисттерге, бүгүнкү күндө үзүрлүү эмгектенип жаткан жалпыга маалымдоо каражаттарынын өкүлдөрүнө жана басма сөз кызматкерлерине терең ыраазычылык билдирем.

Сиздерге бекем ден соолук, үй-бүлөлүк бакыт, чыгармачылык эргүү, кесиптик ийгиликтерди жана жооптуу ишиңиздерде жаңы жетишкендиктерди каалайм. Калемиңиздер курчуп, ар бир сөзүңүздөр салмактуу, эмгегиңиздер коомдун өнүгүшүнө жана өлкөбүздүн келечегине кызмат кылсын!

Басма сөз жана маалымат күнүңүздөр кут болсун!», — деди Медербек Сатыев.