«Мен бул окуяны жөн коё албайм». Ток урган баланын апасы үн катты

Бишкекте электр тогу урган 9 жаштагы бала оор абалда ооруканада жатат. Ал Шаардык балдар тез жардам ооруканасынын жандандыруу бөлүмүндө жасалма дем алдыруучу аппаратка туташтырылган.

Дарыгерлердин маалыматына караганда, бала 26-июлда эс-учун жоготкон жана дем албай жаткан абалда ооруканага жеткирилген. Учурда анын абалы өтө оор. Медиктер ага бардык зарыл медициналык жардам көрсөтүлүп жатканын билдиришти.

Окуя 26-июль күнү саат 20:13 чамасында Октябрь райондук сотунун имаратынын маңында болгон. Алдын ала маалымат боюнча, бала электр тогуна урунган.

Окуя болгон жерди текшерген «Бишкексветтин» адистери дүкөндөрдүн биринин жанындагы темир тепкичте электр чыңалуусу бар экенин аныкташкан. Имараттагы экинчи бөлүктүн электр камсыздоосу толук өчүрүлгөндөн кийин гана чыңалуу жоголгону белгилүү болгон.

Алдын ала маалыматтарга ылайык, кырсыкка имараттын ички электр тармагындагы сырткы жарыктандыруу линиясынын бузулушу себеп болушу мүмкүн.

Учурда милиция окуянын бардык жагдайларын тактоо үчүн териштирүү иштерин жүргүзүүдө.

Бул арада баланын апасы видео кайрылуу жасап, уулунун абалы жана окуя боюнча өз оюн билдирди.

«Азыр эмне кыларымды билбей турам. Баламдын абалы өтө оор. Дарыгерлердин айтымында, анын мээси катуу жабыркаган. Кычкылтек менен кан айлануу болжол менен 10 мүнөткө токтоп калган экен. Балам клиникалык өлүмдү баштан өткөрдү.

Мен бул окуяны жөн коё албайм. Анткени уулум буга чейин дени сак, спорт менен машыккан бала болчу. Азыр болсо алсыз абалда ооруканада жатат. Биз тууган-урук болуп, Кудайдан анын аман калышын тилеп жатабыз.

Мындай окуя үчүн ким жоопкерчилик алат? Баламды ток урган арык дагы эле ачык бойдон турат. Ал жерди кылдат текшерип, электр тогу кайдан пайда болгонун аныктоо зарыл. Эгер азыр чара көрүлбөсө, ал жер башка жарандар үчүн да кооптуу бойдон калат.

Мен баламдын башына түшкөн мындай оор сыноо башка эч бир үй-бүлөнүн башына келишин каалабайм», – деди баланын апасы.