Министр эскертти. Мектептерде мыйзамсыз акча чогултуу токтотулат
Агартуу министри Догдуркүл Кендирбаева Бишкектеги айрым мектептерде оңдоп-түзөө иштерине ата-энелерден мыйзамсыз акча чогултулган фактылар аныкталганын билдирди. Бул тууралуу ал 3-июнда журналисттердин суроолоруна жооп берип жатып айтты.
Министрдин маалыматына караганда, аталган фактылар боюнча бир нече материалдар укук коргоо органдарына өткөрүлүп берилген. Айрым учурларда жооптуу кызматкерлерге, анын ичинде мугалимдерге карата тартиптик чаралар көрүлүп, жумуштан бошотуу учурлары да катталган.
Догдуркүл Кендирбаева мектептерде акча чогултууга тыюу салынганын белгилеп, мыйзамсыз каржылык жыйымдарды уюштурган директорлор жана мугалимдерге карата катуу чаралар көрүлөрүн эскертти.
Агартуу министрлиги буга чейин мектептерди оңдоп-түзөө иштерине мугалимдерди жана ата-энелерди тартууга жол берилбей турганын, өзгөчө жайкы мезгилде мындай аракеттерге тыюу салынганын билдирген.
Бөлүшүү:
