Ошто 1000ден ашык окуучуга ылайыкташкан заманбап мектеп салынууда
Кыргыз Республикасынын Курулуш министрлиги тарабынан Ош шаарындагы Сары-Зоо конушунда заманбап мектептин курулушу уланууда. Долбоор Садыр Жапаровдун тапшырмасынын негизинде мамлекеттик бюджеттин эсебинен ишке ашырылып жатат.
Маалыматка ылайык, жаңы билим берүү мекемесинин жалпы аянты 4215 чарчы метрди түзүп, имарат 5 блоктон курулууда. Курулуш иштеринде бардык техникалык талаптар жана курулуш нормалары сакталып, ар бир этап тиешелүү көзөмөлдөн өткөрүлүүдө.
Учурда курулуш аянтчасында эки нөөмөт менен 70ке жакын жумушчу эмгектенүүдө. Үч кабаттуу мектеп пайдаланууга берилгенден кийин 1000ден ашуун окуучу заманбап шартта билим алуу мүмкүнчүлүгүнө ээ болот.
Белгиленгендей, жаңы мектеп аймактагы окуучу орундардын тартыштыгын азайтып, балдар үчүн коопсуз жана ыңгайлуу билим берүү чөйрөсүн түзүүгө багытталган.
