Ошто Кыргызстан менен Өзбекстандын бизнес-форуму өттү
22-июлда Ош шаарындагы «Jannat Resort» мейманканасында Кыргызстан менен Өзбекстандын ишкерлеринин бизнес-форуму өттү.
Форумду Ош шаарынын мэри Жанарбек Акаев ачып, эки өлкөнүн ишкерлеринин ортосундагы кызматташтыкты чыңдоо жана жаңы биргелешкен долбоорлорду ишке ашыруунун маанисин белгиледи.
Иш-чарага Кыргызстандын жана Өзбекстандын мамлекеттик органдарынын өкүлдөрү, ошондой эле эки өлкөнүн бизнес чөйрөсүнүн өкүлдөрү катышты. Өзбекстандан келген 80ге жакын ишкер соода-экономикалык кызматташтыкты кеңейтүү, инвестиция тартуу жана биргелешкен долбоорлорду ишке ашыруу маселелерин талкуулашты.
Форумдун алкагында Ош шаарынын туристтик потенциалы жана инвестициялык мүмкүнчүлүктөрү тааныштырылып, катышуучулар шаарда ишке ашырылып жаткан ири инфраструктуралык жана социалдык-экономикалык долбоорлор тууралуу маалымат алышты.
