Президент үч жашка чейинки бардык балдарга жөлөкпул берүү тууралуу Жарлыкка кол койду
Садыр Жапаров үч жашка чейинки бардык балдарга ай сайын берилүүчү “Бала ырысы” аттуу жаңы мамлекеттик жөлөкпулду киргизүү жөнүндө Жарлыкка кол койду. Бул тууралуу Президенттин басма сөз кызматы билдирди.
Маалыматка ылайык, жөлөкпул 2026-жылдын 1-июлунан тартып төлөнө баштайт. Төлөм үй-бүлөнүн кирешесине карабастан, үч жашка чейинки ар бир балага берилет. Жөлөкпулдун көлөмү айына 1200 сомду түзөт.
Мамлекет башчысы: “Мамлекет башчысы катары мен мамлекеттик жөлөкпулдар системасына байланышкан көптөгөн арыз-даттануулар түшүп жатканын көрүп жатам. Көп учурда жөлөкпул алуу дээрлик өтө албай турган тоскоолдуктарга айланып кетет. Энелердин басымдуу бөлүгүнүн чыныгы муктаждыктары көбүнчө көңүл сыртында калууда. Үй-бүлөлөр мамлекеттен жардам сурап кайрылышат, бирок колдоо алуунун ордуна баш тартууларга жана бүтпөгөн бюрократиялык жол-жоболорго туш болушат.
Айрыкча эмчектеги ымыркайларга тийиштүү болгондо мындай жагдайлар таптакыр жол берилгис. Адамдын эң негизги дене тарбиялык жана акыл-эс жөндөмдөрү жашоосунун дал ушул алгачкы жылдарында калыптанат жана өмүр бою сакталып калат.
Ошондуктан бүгүнкү Жарлыгым менен Министрлер Кабинетине “Бала ырысы” аттуу жаңы жөлөкпулду киргизүү иштерин иштеп чыгууну тапшырдым. Биз билебиз: ар бир бала өзүнүн ырыскысы, бактысы жана берекеси менен төрөлөт.
Албетте, кээ бирөөлөр мында кыянаттык менен пайдалануу болушу мүмкүн деп айтар. Бирок мен чындап муктаж болгон бир дагы бала колдоосуз жана азык-түлүксүз калбашы үчүн мамлекет муктаж эместерге бир нече ашыкча жөлөкпул төлөгөнү жакшы деп эсептейм.
Мен бир да бала көңүл сыртында калбаган Кыргызстанды куруп жатам. Биз жасап жаткан иштердин баары балдарыбыз жана Кыргызстаныбыздын келечеги үчүн. Башталган экономикалык өсүш жакынкы жылдары жакырчылыкты жоюп гана тим болбостон, ар бир кыргызстандыкка татыктуу жашоо шартын түзүүгө мүмкүнчүлүк берет деп ишенем”, — деди.
Маалыматка караганда, өлкөдө үч жашка чейинки 445 миңге жакын бала жашайт. Жаңы социалдык колдоо чарасы балдар арасындагы жакырчылыкты азайтууга жана жаш үй-бүлөлөрдү колдоого багытталган.
