Россия Федерациясында чет өлкөлүк жарандардын милдеттүү медициналык кароодон өтүү тартибин бузгандыгы үчүн жоопкерчиликти күчөтүүчү жаңы өзгөртүүлөр күчүнө кирди. Бул тууралуу Кыргызстандын Россиядагы элчилиги маалымдады.
Маалыматка ылайык, жаңы эрежелер Россияда жүргөн же ал жакка барууну пландап жаткан Кыргызстандын жарандарына түздөн-түз тиешелүү.
Медициналык кароодон өтүүдөн баш тарткан же андан качкан чет элдик жарандарга 25 миңден 50 миң рублга чейин айып пул салынып, аларды өлкөдөн чыгаруу маселеси каралат. Айып пул өз убагында төлөнбөгөн учурда анын көлөмү эки эсеге көбөйтүлүп, жаран Россия Федерациясынан милдеттүү түрдө депортацияланышы мүмкүн.
Ошондой эле кооптуу оорулары жок деген жасалма медициналык маалымкаттарды даярдоо, колдонуу же сатуу фактылары боюнча кылмыш жоопкерчилиги каралган.
Белгиленгендей, үстүбүздөгү жылдын 1-сентябрынан тарта Россияда 90 күндөн ашык мөөнөткө барууну пландаган чет өлкөлүк жарандар өлкөгө кирген күндөн тартып 30 календардык күндүн ичинде милдеттүү түрдө медициналык кароодон өтүүгө тийиш.
Кыргызстандын элчилиги жарандарды кабыл алуучу өлкөнүн мыйзамдарын так сактоого жана мыйзамдык тартиптерди бузбоого чакырды.
