ШКУнун маданият министрлеринин жыйыны Гала-концерт менен жыйынтыкталды

19-июлда Чолпон-Ата шаарында Шанхай кызматташтык уюмуна (ШКУ) мүчө мамлекеттердин Маданият министрлеринин 23-жыйынынын алкагында өнөр чеберлеринин Гала-концерти өттү.

Иш-чарага ШКУга мүчө өлкөлөрдүн расмий делегациялары, маданият жана искусство ишмерлери, дипломатиялык корпустун өкүлдөрү жана коомчулук катышты.

Гала-концертти Кыргызстандын маданият, маалымат жана жаштар саясаты министри Мирбек Мамбеталиев менен ШКУнун Башкы катчысынын орун басары Пяо Янфань ачты. Министр өз сөзүндө маданият мамлекеттер ортосундагы достукту жана гуманитардык кызматташтыкты чыңдоодогу маанилүү күч экенин белгиледи.

Концертте Өзбекстан, Казакстан, Беларусь, Тажикстан, Индия, Иран, Кытай, Россия жана Пакистандын чыгармачыл жамааттары өз өнөрлөрүн тартуулашты. Кыргызстандын атынан «Камбаркан» фольклордук-этнографиялык ансамбли, «Ак марал» бий ансамбли, «Иль Канто» квартети жана Кыргыз улуттук академиялык опера жана балет театрынын балет труппасы өнөр көрсөттү

Гала-концерт ШКУга мүчө мамлекеттердин Маданият министрлеринин 23-жыйынынын маданий программасын жыйынтыктап, катышуучу өлкөлөрдүн улуттук өнөрү менен маданий мурасын даңазалады.