«Түндүк» тиркемесинде эми бардык эмдөөлөр тууралуу маалыматты алууга болот

«Түндүк» мобилдик тиркемесинде «Эмдөө тууралуу сертификат» кызматы кеңейтилди. Эми жарандар COVID-19га каршы эмдөөдөн тышкары, катталган бардык профилактикалык жана башка эмдөөлөрү тууралуу маалыматты электрондук түрдө ала алышат.

Сертификат Саламаттык сактоо министрлигинин маалыматтык системаларындагы маалыматтардын негизинде автоматтык түрдө түзүлөт.

Документте вакцинанын аталышы, дозасы, эмдөө жүргүзүлгөн күнү, сериясы жана өндүрүүчүсү тууралуу маалыматтар көрсөтүлөт. Мындан тышкары, сертификат ээсинин жеке маалыматтары жана сүрөтү камтылат.

Электрондук сертификат кыргыз, орус жана англис тилдеринде жеткиликтүү. Документтин аныктыгын QR-код аркылуу текшерүүгө болот.

Ошондой эле 18 жашка чейинки балдардын эмдөө сертификаты ата-энелеринин «Түндүк» мобилдик тиркемесинде жеткиликтүү болот.

Жаңы мүмкүнчүлүк жарандарга эмдөө тууралуу маалыматтарын смартфон аркылуу тез жана ыңгайлуу алууга шарт түзөт.