Жээнбек Кулубаев коопсуздук саммитине катышты
2026-жылдын 6-ноябрында Кыргызстандын тышкы иштер министри Жээнбек Кулубаев Астанада өткөн жасалма интеллекттин коопсуздугуна арналган «Акаба процесси» саммитине катышты.
Жыйынга Борбор Азия өлкөлөрүнүн башчылары, Иорданиянын королу, бир катар мамлекеттердин жогорку даражалуу өкүлдөрү жана эл аралык эксперттер чогулду.
Саммитте жасалма интеллекттин террористтик жана экстремисттик максаттарда колдонулуу коркунучу талкууланды. Анын ичинде жалган маалымат таратуу, киберчабуулдар жана дипфейк технологияларын пайдалануу маселелери көтөрүлдү.
Жээнбек Кулубаев санариптик технологиялардын өнүгүшү менен пайда болгон жаңы коркунучтарга каршы күрөшүүдө мамлекеттердин кызматташуусу маанилүү экенин белгиледи. Ошондой эле тажрыйба алмашуу жана биргелешкен чараларды иштеп чыгуу зарылдыгына токтолду.
Жыйынтыгында катышуучулар аймактык жана эл аралык коопсуздукту камсыз кылуу үчүн «Акаба процессинин» алкагындагы кызматташтыкты улантууга кызыкдар экенин ырасташты.
