Кыргыз Республикасынын Маданият, маалымат жана жаштар саясаты министрлиги менен “TUU media” ЖЧКсынын демилгеси аркылуу өлкөнүн жети аймагын камтыган ири музыкалык концерттик тур өз ишин улантууда.
Долбоордун негизги максаты заманбап кыргыз музыкасын кеңири жайылтуу, жаш таланттарды колдоо жана аймактардагы жаштардын маданий иш-чараларга жеткиликтүүлүгүн арттыруу.
Концерттик тур Кыргыз Республикасынын Президентинин «Улуттук дем – дүйнөлүк бийиктик», «Инсандын руханий-адеп-ахлактык өнүгүүсү» жана «Улуттук нарк» тууралуу жарлыктарын ишке ашыруунун алкагында өткөрүлүүдө.
Музыкалык программага белгилүү аткаруучулар Бегиш, Freeman993, Bakr, Баястан, Aftok, Era, 7Gen, AGA-INI, KAIBAR, Emir Aga жана башка жаш ырчылар катышууда.
Буга чейин турдун концерттери Баткен, Ош жана Манас шаарларында ийгиликтүү өттү. Алдыда Талас, Нарын, Каракол жана Бишкек шаарларында уюштурулары күтүлүүдө.
Концерттердин графиги:
8-июнь — Талас шаары (борбордук аянт);
17-июнь — Нарын шаары (борбордук аянт);
23-июнь — Каракол шаары (борбордук аянт);
30-июнь — Бишкек шаары (Т. Усубалиев атындагы эски аянт).
Уюштуруучулардын маалыматына ылайык, бардык концерттер көрүүчүлөр үчүн акысыз өткөрүлөт. Иш-чаралардын коопсуз жана жогорку деңгээлде уюштурулушун камсыздоо максатында министрлик жергиликтүү бийлик органдары жана тиешелүү кызматтар менен тыгыз кызматташууда.
Аталган концерттик тур өлкөнүн маданий турмушун жандандырууга, жаштардын чыгармачылыкка болгон кызыгуусун арттырууга жана улуттук музыканы кеңири аудиторияга жеткирүүгө багытталган.
