Жол оңдоого байланыштуу борбор калаадагы айрым автобустардын каттамдарынын багыты өзгөрөт

2026-жылдын 24-июнунан тартып Бишкек шаарында Жаш Гвардия бульвары менен Лев Толстой көчөсүнүн кесилишинде жүргүзүлүп жаткан реконструкция иштерине байланыштуу бир катар коомдук транспорт каттамдарынын жүрүү схемасына убактылуу өзгөртүүлөр киргизилет.

Бишкек шаардык мэриясынын маалыматына ылайык, өзгөртүүлөр №7(Т), №8(Т), №18, №23 жана №62 автобус каттамдарына тиешелүү. Оңдоо-калыбына келтирүү иштери аяктаганга чейин аталган автобустар жакынкы альтернативдүү көчөлөр аркылуу каттайт.

Белгиленгендей, мындай чаралар коомдук транспорттун үзгүлтүксүз иштешин камсыз кылуу жана жол кыймылынын коопсуздугун сактоо максатында кабыл алынууда.

Шаар бийлиги тургундарды жана борбор калаанын конокторун коомдук транспорттун ишиндеги убактылуу өзгөрүүлөр менен алдын ала таанышып, жол жүрүү багыттарын жаңы шарттарды эске алуу менен пландаштырууга чакырат.

Автобустардын жаңыланган жүрүү схемалары боюнча кошумча маалымат тиешелүү кызматтар тарабынан жарыяланат.