Жумгалда медицина кызматкерине кол салууга шектелген жаран камакка алынды

Жумгал районунда медицина кызматкерине күч колдонууга шектелген жаран кармалып, соттун чечими менен камакка алынды.

Нарын облустук ички иштер башкармалыгынын маалыматына ылайык, окуя 2026-жылдын 27-июнунда Жумгал райондук жалпы дарыгерлер практикалык борборунун тез жардам бөлүмүндө катталган.

Маалыматта айтылгандай, кызматтык милдетин аткарып жаткан медицина кызматкерине карата күч колдонуу фактысы боюнча кылмыш иши козголгон. Соттук-медициналык экспертизанын жыйынтыгында жабырлануучунун ден соолугуна жеңил залал келтирилгени аныкталган.

Тергөө иштеринин жүрүшүндө кылмышка шектүү жаран кармалып, соттун чечими менен камакка алынган.

Учурда бул факт боюнча тергөө иштери улантылууда.