31-августта «Бишкек Аренага» 21 жерден акысыз шаттл-бустар каттайт

31-августта VI Дүйнөлүк көчмөндөр оюндарынын ачылыш аземине келген көрүүчүлөр үчүн «Бишкек Аренага» акысыз шаттл-автобустар уюштурулат.

Шаттл-бустар саат 14:00дөн 16:00гө чейин шаардын 21 жеринен жөнөйт. Акыркы автобус саат 16:00дө чыгат.

Каттамдан ачылыш аземине билети же чакыруусу бар көрүүчүлөр пайдалана алышат.

Шаттл-бустардын негизги жөнөө пункттары:

• Эркиндик бульвары, 1/А — темир жол бекети;
• Жибек Жолу – Кулиев көчөлөрүнүн кесилиши;
• Асанбай кичи району;
• Ак-Кула автобекети;
• Тунгуч кичи району;
• мурдагы Чыгыш автобекети;
• Москва көчөсү, 239 — ДЭПО-1;
• Шабдан Баатыр көчөсү, 52 — ДЭПО-2;
• Ала-Тоо конушу;
• Тыналиев көчөсү, 16 жана башка даректер.

Азем аяктагандан кийин көрүүчүлөр шаарга «Бишкек Аренага» келген багыты боюнча ошол эле шаттл-каттамдар менен кайта алышат.

Мэрия көрүүчүлөргө жөнөө пункттарына алдын ала келип, «Бишкек Аренага» өз убагында жетип алууну сунуштады.