Алматыдагы Чайковский атындагы музыкалык колледж Кыргызстандын төрт окуу жайы менен кызматташат

Алматыдагы Пётр Чайковский атындагы музыкалык колледж Кыргызстандын төрт музыкалык окуу жайы менен кызматташуу тууралуу меморандумга кол койду. Документ Бишкекте билим берүү мекемелеринин жетекчилеринин катышуусунда түзүлдү.

Кызматташууга Бишкектеги Мукаш Абдраев атындагы республикалык атайын мектеп-интернаты, Муратаалы Күрөңкеев атындагы Кыргыз улуттук музыкалык окуу жайы, Таштан Эрматов атындагы музыкалык-педагогикалык институт жана Ош шаарындагы Ниязалы атындагы мамлекеттик музыкалык окуу жайы кошулду.

Меморандум окутуучулар менен алмашууну, мастер-класстарды жана биргелешкен концерттерди уюштурууну камтыйт. Ошондой эле студенттердин сынактарга жана фестивалдарга катышуусуна шарт түзүлүп, жаш аткаруучуларга колдоо көрсөтүлөт.

Кызматташтыкты ишке ашыруу үчүн тиешелүү мамлекеттик органдар менен макулдашылган биргелешкен иш-аракеттер программасы түзүлөт.