Баткенде үй-бүлөлүк зордук-зомбулуктун алдын алуу максатында шахмат турнири өттү
Иш-чара Кыргыз Республикасынын Президентинин тиешелүү Жарлыгын аткаруу жана Баткен районунун акиминин тапшырмасынын негизинде өткөрүлдү. Турнирди Самаркандек айыл өкмөтүнүн жергиликтүү бюджетинин колдоосу менен Баткен райондук шахмат федерациясы уюштурду.
Мелдештин ачылышына Баткен райондук мамлекеттик администрациясынын социалдык маселелер боюнча секторунун башчысы Асылкан Саттарова катышып, жаш шахматчыларга ийгилик каалады. Ал спорттун, анын ичинде шахматтын жаштарды тарбиялоодо, интеллектуалдык өнүгүүсүндө жана туура багытта калыптанышында маанилүү роль ойной турганын белгиледи.
Райондук турнирге 27 окуучу катышып, өздөрүнүн шахмат боюнча даярдыгын көрсөтүштү. Жыйынтыгында балдар арасында Садиридинов Мурат биринчи орунду, Аскаров Нурислам экинчи орунду ээледи.
Кыздар арасында Айбек кызы Медина жеңүүчү аталып, Субанкулова Айгерим экинчи, Бакытбекова Жасмин үчүнчү орунду камсыздады.
Катышуучулардын бардыгы ийгиликтүү оюн көрсөтүп, мелдеште бир дагы окуучу упайсыз калган жок. Бул жаш шахматчылардын даярдыгынын жогору экенин көрсөттү.
Уюштуруучулардын айтымында, мындай иш-чаралар жаштар арасында шахматты өнүктүрүүгө, логикалык ой жүгүртүүнү арттырууга жана коомдо үй-бүлөлүк зордук-зомбулуктун алдын алуу боюнча түшүндүрүү иштерин күчөтүүгө багытталган.
