Нарындын көмүрү Бишкектин ЖЭБине биринчи жолу темир жол менен жеткирилет

Нарын облусунан казылган көмүр Бишкектин жылуулук электр борборуна (ЖЭБ) биринчи жолу темир жол аркылуу жеткирилет. Бул тууралуу «Кыргыз темир жолу» мамлекеттик ишканасы билдирди.

Көмүр ташуу үчүн жалпы сыйымдуулугу 1 миң тоннага жакын 15 вагондон турган курам даярдалды.

Ишкананын маалыматына ылайык, көмүрдү темир жол менен ташуу автоунаа жолдоруна түшкөн жүктү азайтып, отунду ири көлөмдө тез жеткирүүгө жана Ысык-Көлдүн экологиясына жүк ташуучу унаалардын терс таасирин кыскартууга мүмкүндүк берет.

Көмүр 2026-жылдын 25-июлунда ачылган Балыкчы — Кочкор жаңы темир жол тилкесиндеги станцияда жүктөлүүдө.

Буга чейин бул багыттан көмүр негизинен автоунаалар менен ташылып келген.