Нарынга өнөр жай паркын куруу: Инвестор электр тармагын өз эсебинен салат
Кыргызстандын Энергетика министрлигинде Нарын облусунда жаңы инвестициялык долбоорду ишке ашыруу маселеси талкууланды.
Министр Алтынбек Рысбеков Чэнду шаарындагы Борбор Азия менен экономикалык жана соода байланыштарын өнүктүрүү ассоциациясынын төрагасы Дэн Бо жана «СтарОушен» компаниясынын директору Чжоу Жун менен жолукту.
Тараптар энергияны көп керектеген, бирок көмүртек бөлүп чыгаруусу төмөн өндүрүштөр жайгаша турган өнөр жай паркын түзүү долбоорун талкуулашты.
Долбоордун алкагында инвестор электр берүүчү линияларды, көмөк чордондорду жана тармакка кошулуу үчүн зарыл болгон башка объектилерди өз каражатына курууну пландап жатат.
Жолугушуунун жыйынтыгында долбоордун энергетикалык бөлүгүн техникалык жана укуктук жактан иштеп чыгуу боюнча министрлик, «Кыргызстандын Улуттук электр тармагы» жана «СтарОушен Инвестмент» ортосунда биргелешкен жумушчу топ түзүү макулдашылды.
