Ошто тынчтыкка чакырган жаранды сабаган төрт жаш бала кармалды

Ош шаарында эрте менен болгон мушташ боюнча төрт шектүү кармалды. Бул тууралуу Ош шаардык ички иштер башкармалыгынын басма сөз кызматы билдирди.

Маалыматка ылайык, окуя бүгүн, 4-августта саат 05:00 чамасында болгон. Алдын ала маалымат боюнча, көчөдө ызы-чуу салып жаткан жаштарды өтүп бара жаткан жаран тынчтыкка чакырган. Бирок эскертүүгө нааразы болгон жаштар ага кол көтөрүшкөн.

Окуяга шектелген төрт жаран ошол эле күнү саат 09:00 чамасында Ош ШИИБдин Сулайман-Тоо милиция бөлүмүнүн кызматкерлери тарабынан кармалды.

Кармалгандар наркологиялык текшерүүдөн өткөрүлүп, алардын спирт ичимдигин ичкени аныкталган. Шектүүлөрдүн автоунаасы айып короого киргизилди.

Маалыматка караганда, кармалгандардын үчөө 2007-жылы, бирөө 2008-жылы туулган. Ал эми жабырлануучу 1969-жылы туулган жаран ооруканага кайрылган.

Учурда тергөө иштери жүрүп, шектүүлөрдүн аракетине укуктук баа берилет.