Жалал-Абад облусунун Сузак районунда окуучунун өлүмүнөн кийин 4 өспүрүм жигит кармалды. Бул тууралуу Жалал-Абад ОИИБдин басма сөз кызматы билдирди.
Маалыматка караганда, Сузак РИИБдин 102 номуруна Сузак районунун тургуну чалган. Ал 2023-жылдын 1-март күнү саат 16:30 чамасында инисин — Сузак районунун Багыш айыл өкмөтүнө караштуу Сафаровка айылында жайгашкан Ж.Бөкөнбаев атындагы орто мектебинин 8-классынын окуучусу, 2008-жылы туулган Т.М.ны өзү окуган мектептин аймагында өзүнө сырттан тааныш болгон балдар уруп, денесине залал келтиришип, окуя болгон жерден качып кеткенин, ал эми Т.М. Сузак районуна караштуу Октябрь аймактык ооруканасына алынып келгенде өзүнө келбей каза болгондугун билдирген.
Бул маалымат ошол эле күнү Сузак РИИБдин маалыматтардын электрондук журналына катталып, алдын ала текшерүү иштери башталган. Окуя болгон жерге Сузак РИИБдин ыкчам тергөө тобу чыгып, кароо жүргүзүлүп, схемасы чийилип, фототаблицасы түзүлгөн. Ал эми 2008-жылы туулган Т.М.нын жансыз денесине карата соттук-медициналык экспертиза дайындалган.
Аталган факты боюнча Сузак РИИБдин тергөө кызматы тарабынан Кылмыш-жаза кодексинин 122-беренесинде (адам өлтүрүү) көрсөтүлгөн кылмыштын белгилери менен кылмыш иши козголгон.
Тергөөнүн жүрүшүндө 1-март күнү саат 14:00 чамасында Сузак районунун Багыш айыл өкмөтүнө караштуу Сафаровка айылында жайгашкан эски мектептин имаратынын ичинде Сузак районунун Багыш айыл өкмөтүнө караштуу Сафаровка айылынын тургундары, Сафаровка айылында жайгашкан Ж.Бөкөнбаев атындагы орто мектебинин 10-классынын окуучулары — 2006-жылы туулган Д.М., 2006-жылы туулган Ю.Ж., 2007-жылы туулган С.А., 2007-жылы туулган А.Ө. жана ошол эле мектептин 9-классынын окуучулары — 2008-жылы туулган Т.М., 2007-жылы туулган Э.Э., 2008-жылы туулган И.Б., 2007-жылы туулган К.М., 2007-жылы туулган Ж.Т.ны бир катарга тизип алып, «Эмнеге түндөсү көчөгө чыкпай жатасыңар?» деп колдору менен уруп жаткан учурда 2008-жылы туулган Т.М. денесине келтирилген жарааттан улам жерге жыгылып, башы дубалдын кырына тийип жарылган. Ал денесинен оор жараат алып, окуя болгон жерде каза болгондугу такталган.
Сузак районунун тургундары — 2006-жылы туулган Д.М., Ю.Ж., 2007-жылы туулган С.А. жана А.Ө. Сузак РИИБдин убактылуу кармоочу жайына киргизилди.
Учурда кылмыш иши боюнча тергөө амалдары жүргүзүлүүдө.
